बलिउड अभिनेता प्रदीप रावतको निधन

बलिउड अभिनेता प्रदीप रावतको निधन

काठमाडौं । चर्चित बलिउड अभिनेता प्रदीप रावतको निधन भएको छ । आमिर खान अभिनित चर्चित सिनेमा गजनीमा खलनायक ‘गजनी धर्मात्मा’को भूमिकाबाट परिचित वरिष्ठ भारतीय अभिनेता रावतको क्यान्सर रोगका कारण निधन भएको भारतीय सञ्चारमाध्यमहरूले पुष्टि गरेका छन् ।

लामो समयदेखि क्यान्सरसँग संघर्ष गरिरहेका रावतको मंगलबार साँझ मुम्बईस्थित अस्पतालमा उपचारका क्रममा ७४ वर्षको उमेरमा निधन भएको हो । उनका प्रबन्धक सिद्धार्थ आर तिवारीका अनुसार रावत पछिल्लो एक महिनादेखि मुम्बईको कोकिलावेन धिरुभाई अम्बानी अस्पतालमा उपचाररत थिए ।

केही समयअघि उनलाई भिवण्डीस्थित क्यान्सर अस्पतालमा सारिएको थियो । रावतका परिवारमा पत्नी कल्याणी रावत र छोरा विक्रमादित्य रावत रहेका छन् । उनको निधनको खबर सार्वजनिक भएपछि भारतीय फिल्म उद्योगका कलाकार तथा प्रशंसकहरूले सामाजिक सञ्जालमार्फत श्रद्धाञ्जली व्यक्त गरेका छन् ।

लगान फिल्ममा सहकार्य गरेका अभिनेता येशपाल शर्माले सामाजिक सञ्जालमा ‘हाम्रा गजनी देवा प्रदीप रावतप्रति हार्दिक श्रद्धाञ्जली’ लेख्दै दुःख व्यक्त गरेका छन् । अभिनेता गजेन्द्र चौहानले पनि रावतलाई श्रद्धाञ्जली अर्पण गर्दै महाभारतमा उनले निर्वाह गरेको अश्वत्थामाको भूमिकाको स्मरण गरेका छन् ।

भारतीय फिल्म उद्योगमा सशक्त खलनायकका रूपमा परिचित रावतले हिन्दी, तेलुगु र तमिल भाषाका चलचित्रमा अभिनय गरेका थिए । उनले सर्फारोस, क्बचाबचयकज, लगान, नायक र गजनी जस्ता सफल चलचित्रमा स्मरणीय भूमिका निर्वाह गरेका थिए । रावतको पछिल्लो चलचित्र चाभा थियो, जसमा उनले यसाजी कांकको भूमिका निभाएका थिए । उनले पल शाह र बिपना थापा अभिनित नेपाली सिनेमामा समेत अभिनय गरेका थिए । भारतीय सिनेमामा खलनायक पात्रलाई प्रभावशाली ढंगले प्रस्तुत गर्ने कलाकारका रूपमा रावतको योगदानलाई दर्शकहरूले लामो समयसम्म सम्झिरहनेछन् । एएनआई