प्रजातान्त्रिक समाजवादका प्रणेता बीपी कोइरालाको ४४औँ स्मृति दिवस मनाइँदै

प्रजातान्त्रिक समाजवादका प्रणेता बीपी कोइरालाको ४४औँ स्मृति दिवस मनाइँदै

काठमाडौं । नेपाली कांग्रेसका संस्थापक नेता तथा नेपालको पहिलो जननिर्वाचित प्रधानमन्त्री विश्वेश्वरप्रसाद (बीपी) कोइरालाको ४४औँ स्मृति दिवस आज देशभर विभिन्न कार्यक्रम आयोजना गरी मनाइँदै छ ।

वि.सं. २०३९ साउन ६ गते ६८ वर्षको उमेरमा निधन भएका बीपी कोइरालालाई नेपाली राजनीतिमा प्रजातान्त्रिक समाजवादका प्रणेता तथा लोकतान्त्रिक आन्दोलनका अग्रणी नेताका रूपमा स्मरण गरिन्छ ।

वि.सं. २०१५ सालको पहिलो आमनिर्वाचनमा नेपाली कांग्रेसले दुईतिहाइ बहुमत प्राप्त गरेपछि बीपी नेपालको पहिलो जननिर्वाचित प्रधानमन्त्री बनेका थिए । आफ्नो कार्यकालमा उनले बिर्ता उन्मूलन तथा ‘जमिन जोत्नेको’ भन्ने ऐतिहासिक भूमिसुधार कार्यक्रम अघि बढाएका थिए ।

प्रजातन्त्र, राष्ट्रियता, नागरिक स्वतन्त्रता र सामाजिक न्यायका पक्षधर बीपीले नेपालको लोकतान्त्रिक आन्दोलनलाई नयाँ दिशा दिएका थिए । राजनीतिसँगै साहित्य क्षेत्रमा पनि उनको महत्त्वपूर्ण योगदान रहेको मानिन्छ ।

बीपीको स्मृति दिवसका अवसरमा नेपाली कांग्रेस, उसका भ्रातृ तथा शुभेच्छुक संस्थालगायत विभिन्न संघसंस्थाले देशभर विचार गोष्ठी, श्रद्धाञ्जलि सभा, पुष्पाञ्जलि तथा स्मरण कार्यक्रम आयोजना गरेका छन् ।

यसवर्ष नेपाली कांग्रेसले जलवायु परिवर्तनप्रति जनचेतना जगाउने उद्देश्यले काठमाडौं उपत्यकामा ‘ग्रिन रन’ आयोजना गरेको छ । आज बिहान आयोजित कार्यक्रममा कांग्रेस सभापति गगनकुमार थापा लगायतका नेता–कार्यकर्ताहरु सहभागी भएका थिए । कांग्रेसको केन्द्रीय नीति, अनुसन्धान तथा प्रशिक्षण प्रतिष्ठानले आज ‘ग्रिन रन’ आयोजना गरेको हो ।