सैनिक ब्यारेकबाट बाढीपीडितको अपिल : होटलमा महंगी छ, चाउचाउ–विस्कुट मिलाइदिनुहोस

सैनिक ब्यारेकबाट बाढीपीडितको अपिल : होटलमा महंगी छ, चाउचाउ–विस्कुट मिलाइदिनुहोस

काठमाडौं । रसुवाका विभिन्न स्थानबाट उद्धार गरी नुवाकोटस्थित आर्मी ब्यारेकमा ल्याइएका बाढीपीडितहरूको उचित व्यवस्थापन हुन नसक्दा समस्या भएको छ ।

बाढी तथा पहिरो प्रभावित क्षेत्रबाट उद्धार गरिएका उनीहरू केही दिनदेखि ब्यारेक परिसरमै बसिरहेका छन् । तर, बसोबास, खानेकुरा तथा आवश्यक सामग्रीको अभावका कारण उनीहरूले कठिनाइ भोगिरहेका छन् । 

ब्यारेकमा चार दिनदेखि बसिरहेका राजेश केसीले होटलहरूमा अत्याधिक महँगी रहेको र पर्याप्त खानेकुरा उपलब्ध हुन नसकेको बताए ।

उनले भने, ‘नमस्कार, मेरो नाम राजेश केसी हो। म विगत चार दिनदेखि यहाँ बसिरहेको छु । यहाँ बस्नेहरूलाई मैले देखिरहेको समस्या भनेको होटलहरूमा एकदमै महँगी छ । खानेकुरा पनि पर्याप्त मात्रामा पुगिरहेको छैन । यहाँ बसिरहेकालाई बिस्कुट, चाउचाउ, पानीलगायतका खाद्य सामग्री उपलब्ध भए केही सहज हुने थियो। जतिसक्दो चाँडो सम्बन्धित निकायसम्म आवाज पुगोस् र यहाँ बस्नेहरूलाई आफ्नो परिवारसँग भेट गराइदिनुहुन अनुरोध गर्दछु।’

ब्यारेकमा ठूलो संख्यामा मानिसहरू राखिएका कारण भीडभाडसमेत बढेको छ । उद्धार गरेर ल्याइएका बाढीपीडित तथा आफन्तको खोजीमा पुगेका परिवारजनका कारण ब्यारेक परिसरमा चाप बढेको हो । 

यसैबीच, बेपत्ता भएका आफन्तको खोजीमा ब्यारेक पुगेका परिवारजन र नेपाली सेनाबीच तनावको अवस्था समेत सिर्जना भएको थियो । आफन्तको अवस्थाबारे जानकारी लिन र खोजीका लागि आग्रह गर्दै पुगेका परिवारजन र सुरक्षाकर्मीबीच केही समय भनाभनको अवस्था देखिएको थियो । 

पीडित परिवारजनले आफ्ना आफन्तको अवस्थाबारे तत्काल जानकारी दिन तथा सुरक्षित रूपमा भेट गराउने व्यवस्था मिलाउन सम्बन्धित निकायसँग आग्रह गरेका छन् ।