विश्वविद्यालयमा गोली चल्दा पाँच जना घाइते, एकको अवस्था गम्भीर

विश्वविद्यालयमा गोली चल्दा पाँच जना घाइते, एकको अवस्था गम्भीर

काठमाडौं । अमेरिकाको भर्जिनिया राज्यस्थित भर्जिनिया स्टेट युनिभर्सिटीको परिसरमा गोली चल्दा कम्तीमा पाँच जना घाइते भएका छन् । घाइतेमध्ये एक जनाको अवस्था गम्भीर रहेको विश्वविद्यालय प्रहरीले जनाएको छ ।

भर्जिनिया स्टेट युनिभर्सिटी प्रहरी विभागका अनुसार विश्वविद्यालयको क्वाड एनेक्सेस क्षेत्रमा गोली चलेको हो । घटनापछि विश्वविद्यालयमा लगाइएको लकडाउन हटाइए पनि अनुसन्धानका लागि ठूलो संख्यामा सुरक्षाकर्मी परिचालन गरिएको छ ।

विश्वविद्यालयका अनुसार शनिबार बिहान करिब १ः२८ बजे बोइसाउ स्ट्रिटको ३३००० ब्लकमा रहेको विश्वविद्यालयका छात्रावासबाहिर गोली लागेका पाँच जना फेला परेका थिए । उनीहरू सबैलाई उपचारका लागि नजिकका अस्पताल लगिएको छ ।

घाइतेमध्ये एक जनाको अवस्था गम्भीर रहेको र अन्य चार जनालाई लागेको चोट भने जीवन जोखिममा नपर्ने खालको रहेको विश्वविद्यालयले जनाएको छ । घटनाको अनुसन्धान चेस्टरफिल्ड काउन्टी प्रहरीको नेतृत्वमा भइरहेको छ । अनुसन्धानमा भर्जिनिया स्टेट युनिभर्सिटी प्रहरी, अमेरिकाको ब्युरो अफ अल्कोहल, टोबाको, फायरआम्र्स एन्ड एक्सप्लोसिभ्स (एटीएफ) तथा ह्यानोभर काउन्टी शेरिफको कार्यालयले सहयोग गरिरहेका छन् ।

विश्वविद्यालयले घटनाबारे कुनै जानकारी भएका व्यक्तिलाई प्रहरीलाई जानकारी गराउन आग्रह गरेको छ । गोलीकाण्डको कारण तथा घटनामा संलग्न व्यक्तिबारे तत्काल थप विवरण सार्वजनिक गरिएको छैन । विश्वविद्यालयले सामाजिक सञ्जालमार्फत लकडाउन हटाइएको जानकारी दिँदै अनुसन्धान जारी रहेकाले परिसरमा सुरक्षा उपस्थिति कायमै रहने जनाएको छ । एएनआई